Бұл мереке – халқымыздың рухани мұрасын дәріптеп, ұлттық өнерге деген құрметті арттыратын ерекше күн. Домбыра – қазақтың ғасырлар бойы бірге жасап келе жатқан қастерлі аспабы, ұлттың тарихы мен мәдениетінің айнасы.
 

Новоильин ауылының тұрғындары Қабылхан Айбек пен жұбайы Қарлығаш ұлттық өнерді ұлықтап жүрген өнерлі жандардың қатарында. Екеуі де жоғары білімді ұстаздар. Мектеп қабырғасында шәкірт тәрбиелеп қана қоймай, өнер арқылы жастардың бойына ұлттық құндылықтарды сіңіріп келеді.
 

Домбыра олардың өмірінің ажырамас бөлігіне айналған. Бала кезден ұлттық музыкаға қызығушылық танытқан ерлі-зайыптылар бүгінде домбырамен ән айтып, күйлер орындап, ауыл тұрғындарына көтеріңкі көңіл күй сыйлап жүр. Олар ауылдық мәдени іс-шаралардың белсенді қатысушылары ғана емес, аудан көлемінде ұйымдастырылатын концерттер мен мерекелік бағдарламаларда да өз өнерлерін көрсетіп келеді.
 

Қай концерт болмасын, Қабылхан Айбек пен Қарлығаштың өнеріне көрермендер ерекше ықылас танытады. Себебі олардың орындауындағы әр шығармада ұлттық рух, туған жерге деген сүйіспеншілік пен қазақ өнеріне деген құрмет сезіліп тұрады. Домбыраның қоңыр үні арқылы олар халқымыздың бай мұрасын насихаттап, ұлттық өнердің өркендеуіне үлес қосуда.
 

Ұстаздық қызмет пен өнерді қатар алып жүрген бұл отбасы жастарға үлгі боларлық жанұялардың бірі. Олар оқушыларды өнерге баулып, домбыраның қадір-қасиетін түсіндіруге ерекше көңіл бөледі. Өйткені ұлттық өнерді құрметтеген ұрпақ өз халқының тарихын, мәдениетін де құрметтейді.

Домбыра – жай ғана музыкалық аспап емес, ол – ұлттың үні, халықтың жүрек лүпілі. Осындай қасиетті өнерді дәріптеп жүрген Қабылхан Айбек пен Қарлығаш сияқты өнерлі жандардың еңбегі әрдайым құрметке лайық.

Ұлттық Домбыра күні қарсаңында өнерлі отбасыға шығармашылық табыс, отбасылық бақыт және жаңа жетістіктер тілейміз. Домбыраның күмбірлеген үні әрдайым халқымыздың рухын асқақтатып, ұлттық өнеріміздің мәртебесін биіктете берсін!