"Үш бәйтерек - үш діңгек: Сәкен, Ілияс, Бейімбет"

24.10.2019 ж. Қазақ халқы "Үш бәйтерек" деп атап кеткен Ілияс Жансүгіров, Сәкен Сейфуллин, Бейімбет Майлин - қазақ әдебиетіне айтулы ақын, қарымды қаламгер, дарынды драматург ретінде үлкен үлес қосқан бір заманның өкілдері. Олардың қаламынан Қазақстанның дарқан даласы, өндіріс орындары мен еңбек адамдарының іс-әрекеттері, өмірге деген құштарлықтары, болашаққа үміт сенімдері әдеби көркем туынды болып төгілді. "Үш бәйтерек" ұлттық сөз өнерін азаматтық бейне, беделімен де, қайраткер, қаламгерлігіменде биік белеске көтерді. Ұлт руханиятын даңқты туындыларымен, тақырып байлығымен, жанрлық қырларымен, көркемдік әлемі мен байытты. Әдебиеттің "Үш бәйтерегі" өмірдегі өрнекті өнегелерімен халық жүрегіне жол тапты.

1894-1938 жылдар аралығында қатар өмір сүріп, туған елі үшін еткен еңбектерімен шырқау көкке көтерілген, халқының болашағына жол сілтеген асыл перзенттерінің туғанына биыл 125 - жыл толуына арналған Аудандық Мәдениет сарайында "Үш бәйтерек - үш діңгек: Сәкен, Ілияс, Бейімбет" әдеби сазды кеш өтті. Кеште ұлттық-рухани тамырынан нәр алып, тарлан тарихтың жасампаз, бүгінгі күн мен жарқын болашақтың көкжиектерін үйлесімді сабақтастыратын тәуелсіз Қазақ елінің ертеңі - өскелең ұрпақ - әдебиетке қызығушылықтары бар Нөмір 2,3,9 мектептерінің оқушылары Ілияс Жансүгіров, Сәкен Сейфуллин, Бейімбет Майлиннің өлеңдері мен поэзияларын оқып, шығармаларының үзінділерінен сахналық көріністер көрсетіп, әндерін орындады.