Кезекті кейіпкер - Мизамбаева Лиза Таутанқызы, Амангелді ауданының мәдениет үйінде әдістемелік кабинет меңгерушісі. Тәуелсіздік алған сонау тоқсаныншы жылдардан бастап мәдениет, өнер саласында еңбектеніп келеді.
- Лиза ханым, өнер жолына қалай түстіңіз? Өміріңіздегі нендей оқиғалар себепкер болды?
- Еңбек жолымды 1987жылы орталық кітапханада библиограф болып бастадым. 1991 жылдан бері аудандық мәдениет үйінде жұмыс істеймін. Осы салада алғаш өнерге деген қызығушылық, мәдени іс-шаралар ұйымдастыруға баулыған ҚР Мәдениет қайраткері, белгілі музыкант, сол кездегі мәдениет бөлімінің басшысы Сапарғали Ахметжанов еді. Бүгінгі таңда Нұр-Сұлтан қаласында тұрады, ұстаз, музыкант, Амангелді ауданында алғаш ұлт -аспаптар оркестрін құрып, "Халықтық"-атағын қорғатқан жан. Міне, сол ұстазымның бағыт-бағдар сілтеуімен өнердің, мәдениеттің сүрлеуінде жүрген жайымыз бар.
- Әне-міне дегенше, доңыз жылын да түйіндеп қалғандаймыз. Ұжымыңыз үшін бұл жыл несімен ерекшеленді?
- 2019 жыл біздің ұжым үшін көптеген жаңалыққа толы болды. Ұлттық Домбыра күніне, "Рухани жаңғыру" бағдарламасы аясында, «1000 домбыра флешмобы», «Қызғалдақтар» фестивалі және Жастар жылына орайластырылған үлкен екі жоба, менің авторлық бағдарламаларым " Жалындаған жастар-өнер айдынында" атты шоу бағдарлама мен "Жұлдыз Live"-атты жас мұғалімдер арасында апталық өнер сайысын көрермен жылы ықыласпен қарсы алды.
- Ауыл, аудандардағы мәдениет үйлерінде маман тапшы дегенді құлағымыз шалғаны бар. Сонда, қазіргі жастар, жалпы мамандар ауылдық жерлерді жерсінбей жүр ме, әлде себеп басқада ма? Әрине, бұл тұста көпке топырақ шашудан аулақпыз.
- Біздің ауданда мәдениет саласында, соның ішінде ауыл клубтарына қажет мамандар - хореограф, баянист, қобызшы, режиссер. Егер, бізге осы мамандық иелері келіп жатса, баспанамен қамтамасыз ете аламыз. Әсіресе, жастар үшін таптырмас мүмкіндік деп білемін.
- Мәдениет саласын ілгерілету үшін біреулер қыруар қаржы қажет дейді, ал бірі осы салаға деген шексіз ықылас керек дегенді алға тартып жатады. Бүгінде мәдениет үйлеріндегі тыныс-тіршілікте нені өзгертер едіңіз? Сіздің пікіріңіз?
- Әрине, өнер адамы үнемі ізденісте болуы керек, істеймін, осындай жобам бар деп, құлшыныс білдірген жанға қазір барлық мүмкіндік бар. Ең бастысы, ынта, өз ісіне деген сүйіспеншілік қажет. Мен жасым орта жастан асса да, жаңалыққа жаным құмар, шығармашылық еркіндік жетіспейді. Жоспармен, қатып қалған бір ағымды өзгерту керек!
- Өнер ұжымының басшысы ретіндегі арманыңыз келер жылға жоспарларыңыз қандай?
- Келер жылға жоспар көп, ең бастысы халық шығармашылығы көркемөнерпаздар фестиваліне дайындық. «Супер Ауыл» атты үлкен жоба жоспарлап отырмын, бұл жобада ауыл өнері мен мәдениетін толық насихаттайтын ауыл клубтары арасында сайыс. Біздің аудан өнерлі жастарға, өнерпаздарға бай, осы жастарды насихаттау мақсатында, басқа қалалар мен аудандарға гастрольдік сапарға шығу. М. Қапышев атындағы халық театрының жұмысын жандандыру. Міне, негізгі деген межелеріміз осындай.
БЛИЦ
1. Соңғы оқыған кітабыңыз?
- Мен кітапқұмар жанмын, қазақ жазушыларының шығармаларын оқып өстім.
Сүйікті авторларым: Ә. Кекілбаев, М. Мағауин, І. Есенберлин, О. Бөкей, Ә. Нұршайықов, Д. Исабеков, Ә. Тарази т. б. І. Есенберлиннің тарихы романдарын қайталап оқудан жалыққан емеспін.Сонымен қатар, орыс тілінде көп оқимын
Соңғы оқыған кітабым, әлемдік бесстелер, Сидни Шелдон "Если наступит завтра" романы.
2. Бүгінгі қазақстандық киногерлердің қандай туындыларын көрдіңіз?
- А. Сатаевтың "Анаға апарар жол" фильмі.
3. Өмірлік ұстанымыңыз?
- Өмірлік ұстанымым - өтірік айтпау, өз ісіме адал болу, заманның талабынан кейін қалып қоймау, ізденісте болу.
4. Патриот деген кім?
- Патриот - ол өз ұлтын, тілін, халқын сүйетін жан. Мен үшін нағыз патриот, ол, қазақ өнерін төрт құрлыққа танытқан, әлем әншісі - Димаш Құдайбергенов.
5. Сіз үшін бақыттың өлшемі неде?
- Бақыттың өлшемі мынау деп, дөп басып айту қиын. Дегенмен, бақыт мен үшін елдің тыныштығы, отбасы мен жақындарымның амандығы, сүйікті мамандығымның жемісі мен жеңісі.
