Биыл Арқалық қаласы өзінің айтулы мерейтойын – 70 жылдығын атап өтеді. Бұл – бір ғана қаланың емес, қасиетті Торғай өңірінің, осында кіндік қаны тамған, еңбек етіп, білім алған, жүрегінде Арқалыққа деген сағынышы бар әрбір жанның мерекесі.

 
Осы мерейтой қарсаңында Арқалық қалалық әкімдігі облыстық халық шығармашылығы орталығының басшысы Дәмер Қалқаевқа ерекше өтініш білдіреді. Оның тілегі Арқалықтың ажары мен айбынын, тарихы мен тағдырын, сағынышы мен мақтанышын жүрекке жеткізетін, халықтың жүрегінен орын алатын жаңа ән дүниеге келсе деген ниет еді.

 
Бұл аманатты Дәмер Қалқаев Қазақстан Республикасының Еңбек сіңірген қайраткері, белгілі композитор, «Алтын микрофон» байқауының қазылар алқасының төрағасы Жеңіс Сейдоллаұлына жеткізеді. Бұл таңдаудың да өзіндік сыры бар. Себебі сазгердің жары Алмагүл ханым кезінде Арқалықта білім алып, жастық шағының ең жарқын күндерін осы қалада өткізген. Сондықтан бұл шаңырақ үшін Арқалық жай ғана қала емес, жастықтың, достықтың, сағыныштың мекені. Композитордың жүрегінде көптен бері бұғып жатқан сезім дәл осы сәтте ән болып өрілді. Көптің күткен туынды дүниеге келді.

 
Жаңа әннің сөзін де қазақ журналистикасы мен поэзиясының белгілі өкілдері – жерлес журналист Анар Төлеухан мен ақын Серік Қалиев жазды. Екі қаламгердің жүрекжарды жыры мен Жеңіс Сейдоллаұлының сырлы әуені тоғысқанда, Арқалыққа деген шынайы махаббаттан туған ерекше шығарма өмірге келді.

 
Композитор жаңа әнді алғаш болып өмірлік серігі Алмагүл ханымға тыңдатады. Әнді тыңдап болған соң ол толқып отырып, әзіл шыны аралас:

 «Егер осы әнді жас күніңде шығарғанда, саған тағы бір перзент сыйлар едім...» – деген екен. Бұл сөздің астарында әннің жүрекке жеткен шынайы әсері, өткен күндерге деген сағыныш пен Арқалыққа деген ерекше іңкәрлік жатқандай.

 
«Армысың, Арқа қалам» көп әннің бірі емес, туған жерге тағзым, жастық шаққа сағыныш, елге деген сүйіспеншілік пен жанашырлықтың әуенге айналған көрінісі. Бұл – бір адамның емес, бір қаланың жүрек үні, бірнеше жанның еңбегі. 

 
Мерейтойлық тартудың тұсауы Арқалық қаласының туған күні мерекесінде кесілмек. Әнді автор, композитор Жеңіс Сейдоллаұлы сахнада өзі орындап, туған қала халқына сый ретінде ұсынбақ.

 
Дүниеге «Армысың, Арқа қалам!» атты шынайы сүйіспеншіліктен, сағыныштан және туған жерге деген құрметтен туған жаңа ән келді. Жыр болып ел арасына тарап, әуен болып көңілге қонып, әрбір жанның жүрегінен орын алғай. Қаланың мерейтойына шашу болып, халықтың рухын асқақтатар ортақ әніне айналсын.

 
Асқақ рухың аласармасын, еңсең әрдайым биік болсын! Талай талантты түлеткен, талай тағдырды тоғыстырған қасиетті Арқалықтың мерейі артып, мәртебесі биіктей берсін.

 
Болашағың баянды, бақ-берекең мәңгі болсын! 70 жылдық мерейтойың құтты болсын, ардақты Арқалық!