"Жас тұлпар" облыстық оқушылар айтысына қатысушы талапкерлер мен олардың жетекшілерінің қатысуымен шеберлік сабағы өтті.
Оны танымал айтыскер ақын, Ы.Алтынсариннің облыстық мемориалды мұражайының директоры Марғұлан Оспанов жүргізді.
Марғұлан Бақытбекұлының дәрісі бірнеше бөлікке жіктеліп, сөз саптау, ой баптау, мақам таңдау, сахна мәдениеті секілді айтыскердің бойынан табылуы тиіс негізгі талаптар тұрғысында өрбіді.
Ол өз тәжірибесінен мысалдар келтіріп, айтыс барысында жиі ұшырасатын ағаттықтар туралы ой қозғады. Суырыпсалмалық өнерге енді машықтанып келе жатқан жас буынға ақыл-кеңестерін айтып, бағыт-бағдар берді.
Шеберлік сағаты соңында барлық қатысушыға сертификат табыс етілді.
Айта кету керек, осы іс-шара аясында өңірге танымал айтыскерлер – Салтанат Өтелбаева, Ғалымгерей Кенжеғозин, Мамай Ізтілеу және Марғұлан Оспановтың Қазақстан Айтыскерлер одағының мүшелігіне өткені мәлім болып, ресми түрде куәліктері табыс етілді.
Бұдан соң бүкіл қатысушылар Ахмет Байтұрсынұлының ескерткішіне тәжім етіп, гүл шоқтарын қойып, университеттегі мұражайын аралады.
Естеріңізге саламыз, бүгін сағат 10.00-де Ахмет Байтұрсынұлы атындағы Қостанай өңірлік университетінде ұлт ұстазының 150 жылдығына арналған "Жас тұлпар" оқушылар айтысы өтеді.
