2021 жылдың 16 сәуірінде Қостанай ауданы, Тобыл қаласы «Алтын дән» мәдениет үйінде «Рухани жаңғыру» мемлекеттік бағдарламасын жүзеге асыру аясында ҚР Тәуелсіздігінің 30 жылдығы қарсаңында қазақтың аса көрнекті ағартушы-педагогы, жазушы, этнограф, қоғам қайраткері Ыбырай Алтынсариннің 180 жылдығына арналған «Жас тұлпар» облыстық оқушылар айтысы өтті.
Айтыстың мақсаты – болашақ ұрпаққа айтыс өнерін жеткізу, оқушылардың шығармашылық қабілетін дамыту, ағартушы-педагог, этнограф Ы.Алтынсариннің мәдени мұрасын дәріптеу, өз ойын поэзия тілімен шебер жеткізе алатын оқушы ақындарды анықтау.

«Жас тұлпар» облыстық оқушылар айтысына Қостанай қаласынан Ы.Алтынсарин атындағы мамандандырылған мектеп-интернатынан, Амангелді, Б.Майлин, Жангелдин, Жітіқара, Қарабалық аудандары мен Рудный, Арқалық қалаларынан 11 ақын қатысты. 

Айтысқа танымал өнер қайраткерлері, ақын – жазушылар, айтыс өнерінің қыр-сырын білетін кәсіби мамандар Қалиев Айбек Киікбайұлы - «Құрмет» орденінің иегері, ҚР Мәдениет саласының үздігі АрқМПИ профессоры Қазылар алқасының төрағасы, Құлабаев Нұрқанат Жүнісұлы – ақын, журналист, Республикалық «Егеменді Қазақстан» газетінің меншікті тілшісі, Нұғыман Ағыбай Қараұлы – Ы.Алтынсарин атындағы мамандандырылған мектеп–интернатының қазақ тілі мен әдебиеті пәнінің мұғалімі төрелік етті.

Айтыс қорытындысы бойынша, Бас бәйгені Рагат Нұрислам (Арқалық қаласы), І – орын Әуезхан Саят (Амангелді ауданы), ІІ- орын Төлеуов Нұрлыбек (Арқалық қаласы) ІІІ-орын Тоққожаев Жамбыл (Рудный қаласы) иемденді. Айтысқа қатысқан жеті өнерпазға айтыстың ақтаңгері Айбек Қалиев қаржылай демеушілік жасап сыйақы табыстады. Айтыс жеңімпаздары қаржылай сыйақы және дипломдармен марапатталды.

«Жас тұлпар» айтысына жас ақындарды баулып, тәжірибелі тәлімгерлігі үшін жетекшілер Ахметбеков Байбатыр, Аюпов Сейілхан, Айтқожин Мырзагелді, Ізтілеу Мамайға Қостанай облыстық мәдениет басқармасының, Қостанай облыстық білім басқарма басшыларының алғыс хатына ие болды.
Айтысқа қатысқан жас ақындарға, жетекшілерге алғыс айтамыз!