«Келіні жақсының – керегесі алтын» аудандық сайысы

21 наурызда Наурыз мейрамының қарсаңында «Рухани жаңғыру» бағдарламалық мақаласының аясында АМҮ-де «Келіні жақсының – керегесі алтын» аудандық сайысы өтті. Онда Қамысты ауданының ауылдарынан келген 18-35 жас аралығындағы жас келіншектер қатысты. Барлық келіндер бес кезеңде сайысты: «Сәлем – сөздің анасы» таныстыру; «Салт-дәстүрді білесің бе?» салт-дәстүрге байланысты сұрақтарға жауап берді; «Ұлттық тағам – ұлы тағам» елімізде тұратын халықтардың кез келген ұлттық тағамын әзірлеп, неліктен ол тағамды дайындағанын айтты; «Өмірімді өнеріммен өрнектеймін» кезеңінде келіншектер өз өнерлерін көрсетті; ал «Пысық келін» кезеңінде келіншектер ән аяқталғанша сахнада жарыса еттің нанын жайды. Келіншектер өздерін нағыз келінге лайық инабатты, кішпейіл, пысық келіндер ғана емес, сонымен қатар сегіз қырлы, бір сырлы екендерінде сайыс барысында жеткізе алды. Залда отырған көрермендер келіндерге қарап сүйсінді.
Сайыс кезеңдері арасында Мәдениет үйінің көркемөнерпаз артистері өнер көрсетті. Қазылар алқасы ауданның құрметті кісілерінен болды: ақ жаулықты әже, ақ сақалды ата, Ішкі істер саясаты бөлімінің басшысы және Жастар ресурстық орталығының маманы. Нәтижесінде барлық қатысушыларға ақшалай сыйақы мен Жастар ресурстық орталығының атынан естелік сыйлықтар табысталды. «Үздік келін» атағын Бестөбе ауылың келіні Нұрфайзулина Жеңіскүл Ғалымқызы иеленді. Сонымен қатар АМҮ-нің фойесында ауданның келіндері мен енелерінің бірге түскен фотоларынан «Келін қайын ененің топырағынан жаралады» атты фотокөрме ұйымдастырылды.