Республикалық айтысқа арнайы келген қонағымыз Жүрсін Ерман жары Бақытжамал апаймен бірге бүгін ұлы ағартушы Ыбырай Алтынсариннің кесенесіне барып, құран бағыштады. Ол кісілер айтыстың өту барысын жоғары бағалап, ризашылығын жеткізіп, алғыстарын айтып, үйлеріне аттанды.
Осынау жыр додасын өткізуге мұрындық болған ел ағаларына, барша азаматтарға, қолдау білдірген облыстық әкімдікке, Қостанай, Арқалық қалаларының әкімшілігіне, әсіресе Арқалық қаласының әкімі Әмірхан Асановқа алғыс айтамыз. Ол кісі арнайы келіп, сыйлы қонақтарға сый құрметін көрсетіп кетті.
Ақпараттық қолдау білдірген облыстық «Қостанай таңы» газетіне, редакторы Кенжеш Амановаға, «Қостанай» телеарнасына, басшысы Ербол Ипбергеновке ризашылығымызды білдіреміз.
Айтыстың жоғары деңгейде өтуіне себепші болған қазылар алқасына, қонақтарымызға, ақындарға да алғыс айтамыз.
Ең бастысы ұлттық өнерімізді қолдап, сусап келген патша көңіл көрермендерімізге мың да бір алғыс айтамыз. «Тобыл—Торғай жұртшылығы айтысты сағынған екен, жоғары бағалайды екен» деп барша қонақтар лебізін білдіріп, ерекше көңілмен үйлеріне аттанды.
Елдің еңсесі биік болсын!
Тобыл—Торғай өңірінде осындай рухани басқосулар көп болсын!
