Ахмет Байтұрсынұлының 150 жылдығына арналған той облыс аумағындағы төтенше жағдайға байланысты кейінге шегерілгені белгілі. Таңертең басталған айтыстың да ақтық айналымы болмайтын болды. Қазылар алқасы жыр додасының жеңімпаздарын бірден анықтап, үздіктердің есімдерін атады.
Сонымен айтыстың бас бәйгесін елге танымал айтыскер ақын Айбек Қалиев иеленді. Бірінші орынды Ұлытау облысынан келген Төлеген Жаманов алды, екінші орыннан Нұр-Сұлтан қаласынан келген Еркебұлан Қайназаров пен қызылордалық Мейірбек Сұлтанхан көрінсе, үшінші орынды Қызылорда облысынан келген Нұрзат Қару мен Павлодар облысының ақыны Жігер Бөкен өзара бөлісті.
Бас жүлдеге жеңіл көлік, бірінші орынға 2 млн, екінші орынға 1 млн және үшінші орын 500 мың теңгемен марапатталды. Айтысқа қатысқан өзге ақындарға 300 мың теңге көлемінде ақшалай сыйлық табысталды.
“Қостанай облысы аумағындағы орман өрті салдарынан туындаған қиын төтенше жағдайға байланысты А.Байтұрсынұлының 150-жылдық мерейтойына қатысты барлық іс-шаралар кейінге шегерілді. Өткізілетін уақыты қосымша хабарланады” деп хабарлады облыс әкімінің орынбасары Арман Әбенов.
