Ауданда қасиетті Мәуліт мерекесі тойланды
28 ақпан күні Аудандық мәдениет үйінде ардақты пайғамбарымыз Мұхаммедтің (с.ғ.с.) туылған айына орай ұйымдастырылған Мәуліт мерекесі болып өтті. «Aldııaruly Januzaq» атындағы аудандық мешіт пен «Алтынсарин ауданы әкімдігінің ішкі саясат, мәдениет және тілдерді дамыту бөлімі» ММ ұйымдастыруымен өткен «Менің отбасым-менің мақтанышым» атты жас отбасылар арасындағы байқауға Қостанай облыстық «Марал Ишан» мешітінің бас имамы Тәжімбет Бахытбек Нұрғабылұлы бастаған бірқатар мұсылман өкілдері , ауылдық округтерден келген қонақтар мен аудан тұрғындары қатысты. Байқау аудандық мешіттің имамы Ерік Қожахметұлы бастаған бір топ жігіттердің салауат айтып, бата беруімен басталды. Одан әрі Қостанай облыстық «Марал Ишан» мешітінің бас имамы Тәжімбет Бахытбек Нұрғабылұлы құттықтау лебізін білдірді. Мәуліт мерекесінің мән-маңызы жайлы айтып өткен облыстық имам өкілі сөзінің кеш қонақтары үшін пайдасы ерекше болды. Кездесу барысы «Менің отбасым-менің мақтанышым» атты 3 турдан тұратын байқауға 5 жас отбасы қатысты. Қара қылды қақ жарып, оза шапқан, көрерменнің ықыласына бөленген Алпысовтар отбасы 1-ші дәрежелі дипломмен марапатталса, Едігиндер отбасы 2-ші орынды, Қапиятовтар отбасы 3- ші орынды қанағат тұтты. Ал Мәлік Мұхаметхан мен Кенжебаевтар отбасы қатысқаны үшін марапатқа ие болып, барлық қатысушыларға сый-сияпат ұсынылды.
Сахна төрінде Абзал Нағашыбайұлы «Мұсылманның бес парызы», «Мұрагер» қазақ халық ұлт-аспаптар ансамблі «Бабалар сазы» күйін , Бағдат Сырбайұлы «Сарыарқа» , Серік Нағашыбайұлы «Елге сапар», «Өлшеулі өмір» әндерін айтып, жұрт қошеметіне бөленді.
