Қостанай облысының дарынды жас өнерпаздары Қырғызстаннан зор жетістікпен оралды!
7-10 маусым аралығында Бішкек қаласындағы этно-кешен «Дасмияда» өткен VI Халықаралық көпжанрлы өнер фестиваль-байқауы «KGтай» сахнасында жерлестеріміз — «Алтын микрофон – 2025» облыстық кезеңінің жүлдегерлері Мария Заковоротная (Қостанай қаласы) мен Аяулым Жұмаш (Аманкелді ауданы) өз шеберліктерін жоғары деңгейде көрсетіп, қазылар алқасы мен көрермендердің зор ықыласына бөленді.
Мария Заковоротная өз жас ерекшелігі бойынша бірінші орынды жеңіп алды.
Аяулым Жұмаш жүлделі үшінші орынға ие болып, қола медальмен марапатталды.
Аталған фестиваль түрлі елдердің өнерлі өрендерін бір арнаға тоғыстырып, мәдениеттер тоғысында достықты нығайтуға, шығармашылық қарым-қатынасты дамытып, талантты жастарға өз әлеуетін танытуға үлкен мүмкіндік берді.
Жас орындаушылардың бұл байқауға қатысуы Қостанай облыстық халық шығармашылығы және кинобейне қор орталығының қолдауының арқасында жүзеге асты.
Айта кету керек, қыздар осыған дейін «Алтын микрофон – 2025» облыстық кезеңінде сәтті өнер көрсетіп, халықаралық деңгейдегі вокалдық байқауға жолдама жеңіп алған болатын. Бұл беделді шара тамыз айында өтеді деп жоспарлануда.
Біз жас таланттарымызды шын жүректен құттықтаймыз!
Олардың жетістігі — бүкіл өңіріміз үшін үлкен мақтаныш!
Шабыттарыңыз шалқып, өнер жолындағы сапарларыңыз сәтті болсын! Алдағы халықаралық байқауда да жарқырай көрінулеріңізге тілектеспіз!
