Қостанай ауданы Заречный ауылындағы «Современник» мәдениет үйінде «Тобыл-Торғай – тұңғыштардың мекені» атты «Жас тұлпар» облыстық оқушылар айтысы мәреге жетті.

 

Бұл — Тобыл-Торғай топырағында дәстүрге айналған өнер додасы. Биылғы айтыс та аймақтың әр түкпірінен келген жас дарындарды тоғыстырды.

 

Айтыс сахнасы – жас ақындардың қанат қаққан мектебі. Бұл пікірді сахна төрінде сөз сөйлеген Қостанай облысы әкімдігі мәдениет басқармасы басшысының орынбасары Саят Жүсіпов те айрықша атап өтті.

 

– Суырыпсалмалық өнер – халқымыздың рухани коды. Бүгінгі айтыста сөз сайысына түскен жас талапкерлер – ертеңгі елдің сөзін ұстайтын көшбасшылар. «Жас тұлпар» – тек сайыс емес, бұл – айтыс мектебі. Мұнда алғаш сахнаға шыққан баланың буыны бекіп, болашағы айқындалады. Сондықтан бұл жобаның жалғасуына барынша қолдау көрсетіледі, – деді Саят Жүсіпов.

 

Айтысқа Қостанай, Меңдіқара, Бейімбет Майлин, Жангелдин, Алтынсарин, Сарыкөл аудандары мен Қостанай, Арқалық қалаларынан 12 оқушы қатысты. Қазылар алқасының шешімімен олар екі кезең бойынша сынға түсті. Алғашқы кезеңде алты жұп айтысып, үздік шыққан үш жұп финалға жолдама алды.

 

Қазылар алқасын ақын, журналист, республикалық «Егемен Қазақстан» газетінің меншікті тілшісі Нұрқанат Құлабаев басқарды. Жыр додасына айтыскер ақындар Ғалымгерей Кенжеғозин мен Айбар Рағатов та төрелік етті. Айта кету керек, Айбар – осы «Жас тұлпар» айтысының түлегі. Айтыс аламанында бағын сынап жүрген жас ақынның өзі де осы додада талай рет өнер көрсеткен.

 

– Менің айтыстағы алғашқы қадамым осы жобамен тығыз байланысты. «Жас тұлпар» – талай таланттың жолын ашқан орта. Бүгін сахнаға шыққан балалардың бойынан да ізденіс пен талап байқалды. Өлеңге деген құрметі бар, сөзге ие болатын ұрпақ өсіп келеді. Осындай жоба арқылы әдебиет пен мәдениет жалғастығын сақтап қалуға болады, – деді Айбар Рағатов.

 

Айбардың туған інісі Нұрислам да айтыста жарқырап шығып келе жатқан жаңа таланттардың бірі.

Айтыстың соңында жас жүйріктердің өнері бағаланып, жеңімпаздар марапатталды. Қазылар шешімімен:

 

 

Айтыстың ұйымдастырушылары – Қостанай облысы әкімдігі мәдениет басқармасы мен облыстық көркемөнерпаздардың халық шығармашылығы және кинобейнеқор орталығы. Сонымен қатар іс-шараға Заречный ауылдық округі мен «Современник» мәдениет үйі де атсалысты.

 

Сахнаға шыққан жас ақындардың арасында айтысқа алғаш қатысқандармен қатар тәжірибелі жүйріктер де болды. Айтыс қорытындысында жүлде алмаса да, ерекше ықыласқа бөленген оқушылар көп болды. Бұл – жобаның өз деңгейінде өткенінің айғағы.

 

Суырыпсалмалық өнер — ұлт руханиятының алтын арқауы. Ал сол арқаудың үзілмеуі – осындай жобалар мен сахналарға байланысты. «Жас тұлпар» — жай ғана айтыс емес, ол – өнер мен өрелі сөздің мектебі.

 

Суреттерді түсірген – Бердіболат КӨРКЕМБАЕВ