Ұшқыр ой мен кестелі сөз сайысында кіл жақсылар бас қосып, бір мықтыны анықтайды.
Осы додаға бір дәуірдің шежіресіндей болған жыршы Қасымхан Алдаберген атамыз да аттанғалы отыр. Ақсақалдың жол серігі облыстық халық шығармашылығы орталығының белді қызметкері, түрлі жобалардың авторы Мұрат Нағашыбай. Бір қызығы Мұрат Нағашыбайдың анасы Ғалия апай мен Қасымхан Алдаберген бір кездері айтысқа түсіп, сөз таластырған. Сол күндердің куәсіндей бейнежазба осы орталықтың бейнеқорында да сақталыпты. Енді, міне, араға талай жылдар салып, Ғалия апайдың ұлы ақсақалды додалы айтысқа апара жатыр. Апай қазір ауылда, немере-шөберелердің ортасында.
Атамыз әлі тың, айтыстың ашылуында арнау орындап, айтыс оғландарына ақ батасын береді.
Айтпақшы, Мұрат Нағашыбай бүгінгі өзінің 40 жасын ғасыр жасаған ақсақалмен бірге жол үстінде өткізіп, ғибратты әңгімесін тыңдап, батасын алып, айтысқа жол бастап бара жатқанын жақсылыққа балайды. Ақсақалмен сапарлас болу туған күнге берілген тамаша сый деп санайды.
