«Алтын дән» мәдениет үйінің өнерпаздарын Қостанай ауданы ғана емес, тұтас облыстың өнерсүйер қауымы жақсы біледі. Шығармашылық үйінің бүгіні қандай, қандай межелерге жоспар құруда? Міне осы төңіректе мекеменің басшысы Гүлжан Жұмағалиқызымет сұхбаттасқан едік.
ӨНЕРДІҢ ОРДАСЫ
- Гүлжан Жұмағалиқызы, әне-міне дегенше, жыл да түгесілгендей. «Алтын дән» мәдениет үйінің 2019 жылы, «Жастар жылында» атқарған ауқымды шаруаларына тоқтала кетсеңіз?
- Мемлекет басшысының 2018 жылғы 13 қарашадағы «Жастар жылын жариялау туралы» жарлығын іске асыру мақсатында Қостанай ауданының барлық клуб мекемелері белсенді жұмыс істеп келеді.
Жастардың азаматтық және патриоттық сезімдерін дамытуға, жас таланттарды табуға және қолдауға ерекше көңіл бөлінеді. Осы мақсатта жастар мен жасөспірімдер мемлекеттік және ұлттық мерекелер аясында өткізілетін барлық іс-шараларға белсенді қатысады. Ауданның барлық клубтық мекемелерінде ақысыз негізде жұмыс істейтін көркемөнерпаздар үйірмелері мен топтары үнемі жас қатысушылармен толықтырылып отырады, оларға шығармашылық өсудің барлық жағдайлары жасалады.
Бүгінгі таңда аудандық мәдени-демалыс орталығында 73 жастар клубының ұйымы болса, оның құрамында 1321 адам бар, оның ішінде 698 адамнан тұратын 52 көркемөнерпаздар тобы және 6 «Халықтық» құрметті атағы бар көркемөнерпаздар топтары жұмыс істейді. Өңірде бірде-бір шара жастар шығармашылық ұжымдары мен жеке орындаушылардың қатысуынсыз өтпейді. Биылғы жылы жастар топтары мен жеке орындаушылар барлық облыстық фестивальдар мен байқауларға, көптеген республикалық байқауларға белсенді қатысты.
«Мәдени-демалыс орталығы» КМҚК мамандары ауданның жастар ресурстық орталығымен белсенді ынтымақтастықта. Биылғы жылы жастар ресурстық орталығымен бірлесе отырып, жастар жылының ашылуын, караоке кешін, «Tobyl star» талантты жастар фестивалін, қыздар арасында «Бұрымды қыз» сұлулық пен таланттар сайысы сияқты бірқатар жастар іс-шараларын өткізді.
Жазда «Жаңару» саябағы аймағында аудандық мәдениет үйінің вокалды және аспаптық топтарының концерттері үнемі өткізіліп тұрды.
Биылғы жылы жастар өкілдері «Болашаққа бағдар – рухани жаңғыру»: бағдарламалық мақаласы аясында өткізілген іс-шараларға белсенді қатысты. Атап айтсақ, аудандық «Қымызмұрындық» фестивалі, қазақтың ақыны Нұржан Наушабаевтың туғанына 160 жыл толуына арналған «Татақ ақын Наушабайдың Нұржаны» атты жастар арасындағы аймақтық айтыс және қазақ халық аспаптар ансамблінің «Ұлы дала - сыры» облыстық фестиваль-байқауын айтуға болады.
- Президент Қасым-Жомарт Кемелұлы қыркүйек айындағы Жолдауында мәдениет саласының қызметкерлеріне ерекше көңіл бөлу керектігі туралы тапсырма берген еді. Бұл жаңалықты, осы сала қызметкерлері ретінде, қалай қарсы алдыңыздар және мәдениет үйіндегі қандай қордаланған мәселелер бар?
- Мәдениет саласының өрісі мен ауқымы қашанда кең болып қала бермек. Елдің рухани дамуы мен кемелденуіне өзіндік үлес қосып келе жатқан салаға лайықты түрде назар аудару — мемлекетіміздің ең маңызды міндеттерінің бірі болып отыр. Сондықтан да мемлекет басшысы Қасым-Жомарт Тоқаев Қазақстан халқына жолдаған «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында аталмыш сала мамандарының жағдайын жақсартуға, еңбек ақыларының ұлғаюына үлкен мән берді.
Жалпы соңғы жылдары мәдениет саласына айтарлықтай көңіл бөлініп келеді. Елбасының «Болашаққа бағдар: рухани жаңғыру» және «Ұлы даланың жеті қыры» атты бағдарламалық мақалаларының халыққа жол тартуы соның айқын дәлелі. Ал, осы бағдарламалардың сапалы жүзеге асырылуына, кеңінен насихатталуына өзіндік үлесін қосып, тынбай еңбек етіп жүрген мәдениет саласының қызметкерлеріне Жолдауда лайықты көңіл бөлінуі бізді қатты қуантты. Мәдениеті өскен мемлекеттің дамыған елдердің қатарына қосылары хақ. Біздің де дамыған 30 елдің қатарына қосыламыз деген талпынысымыз бар. Мұнда мәдениет пен әдебиеттің рөлі өте үлкен. Сол үшін де біз Жолдауға қолдау білдіріп, еліміздің болашағы жарқын болуы үшін аянбай еңбек ететін боламыз.
Ал, мәдениет саласындағы қордаланған мәселе деп маман тапшылығын айтар едім. Әсіресе, ауылдық жерлерде кәсіби мамандардың тапшылығы көңіл қынжылтады. Себебі, шындығында нағыз талантты жастар сол ауылдан шығып жатыр. Сондықтан, ауылда көрінбей жүрген таланттарды мәдениет үйіне тартып, олармен жұмыс жасап, таланттарын ашып, дұрыс бағыт-бағдар беру үшін, ең алдымен ауылдық мәдениет ошақтарында кәсіби мамандар саны артса нұр үстіне нұр болар еді.
- «Жастар жылы» деп, талай шаруаның басын шалдық, ал сіз басқаратын ұжымда жастар көп пе? Жалпы жас мамандарға қандай мүмкіндіктер қарастырылған?
- Мемлекет ауылға жұмыс істеуге келген жас мамандарды қолдауға көп көңіл бөледі. Бүгінгі таңда 13 жас маман «Мәдени-демалыс орталығы» КМҚК-да жұмыс істейді. 2019 жылы 2 маманға тұрғын үй сатып алуға 7 314 000 теңге көлемінде несие, 3 адамға 530250 теңге көлемінде көтерме жәрдемақы берілді.
-
- Мәдениет үйінің тізгінін ұстау адам бойындағы қандай қасиеттерді талап етеді? Қандай қиындықтары бар?
- Мекеме басқарып отырған адамның бойында ең алдымен сабырлылық болу керек. Кез-келген істе шыдамсыздық таныту – басшы адамға үлкен қателік деп есептеймін. Сонымен қатар басшы шыншыл болып, өтірік айтуға, екіжүзділікке жол бермеуі керек.
Өмір болған соң көп жағдайлар болып жатады. Сондай кезде, қол астыңдағы адамдарға түсіністікпен қарап, адамгершілік таныту да маңызды. Жұмыс барысында қызметкерлерге талап қойып, оның орындалғанын қадағалау басшының міндетіне жататыны белгілі. Алайда, талап ету – сенім білдірумен, сыйлаумен сабақтасып жатуы қажет.
- Жоспарларыңыз ?
- 2019 жылы жастармен көптеген жұмыстар атқарылды. Аудандық халық көркемөнер шығармашылығы байқауында көптеген талантты жастар анықталды, олар енді байқаудың ақтық кезеңінде өнер көрсететін болады. 2020 жылы бұл жұмыс әрі қарай жалғасын табады және аудандық мәдениет үйінің сахнасы жаңа жас орындаушылармен толығады және олар біздің ауданымыздың атағын барлық облыстық, республикалық байқаулар мен фестивальдерде қорғайтын болады. Алдағы уақытта Халықаралық, Республикалық байқаулар мен фестивальдерге қатысып, тәжербие алмасып, өз таланттарымыздың бағын сынасақ деген жоспар бар. Сондай-ақ, жаңа таланттарды іздеп, оларға дұрыс бағыт-бағдар көрсетіп, қолдау білдіру біздің басты мақсатымыздың бірі.
Келесі жылға арналған жоспарлар осы бағыттағы жұмыстарды жалғастыруды, сонымен қатар жастарды Алтын Орданың 750 жылдығы, Абай Құнанбайұлының 175 жылдығы, көрнекті ойшыл, ғалым Әбу Насыр әл-Фарабидің 1150 жылдығы және Қазақстан Республикасы Тәуелсіздігінің 30 жылдығы сияқты 2020 жылғы айтулы даталарға арналған іс-шараларға қатысуға тартуды көздейді.
- Сұхбаттасқаныңызға көп рахмет!
Сұхбаттасқан
Нұрқанат Нүсіпхан
Dala_FestKPIАйтысАуыл_тынысыАхмет_Байтұрсынұлы_–_150_жылДеген_екенДомбыра күніЕлге_сәлемЖеңімпаздарЖыр_маржанКездесулер_мен_презентацияларКонцертМарапаттауМәдени_мұраСаясатСағындырған_әуендерТарих_жебесіТеатр_әлеміндеТобыл-Торғай_әуендеріШығармашылық_кешҚазақтың_дәстүрлі_1000_күйіҚұттықтаймыз!Ән_–_көңілдің_ажары
