ТУҒАН ЕЛІН ТАЛМАЙ ЖЫРЛАҒАН

Әндері жергілікті жұртқа танымал торғайлық әуесқой сазгер Болат Молдашев пайғамбар жасына толды. Ол Көкалатта фамилиясымен бірге аталатын өнерпаздардың қатарынан.

Болат Жангелдин ауданының Көкалат ауылында туған. Ата-бабасынан өнер қонған жан.

Әкесі Молдаш атақты Нұрхан Ахметбековті айтысқа шақырған дейтін сөз бар ел ішінде. Жастық желігі басылмаған шайқы жігіттің меселін қайтарғысы келмеген әрі әкесі Жұбантай мен дін ұстаған молда, елге сыйлы діндар ағасы Нұрманғалиды құрметтеген (белгілі айтыскер Отар Нұрманғалиевтің әкесі) ақтаңгер Нұрекең бірақ шумақпен «сәлем жолдап», айтысты мезгілінен бұрын доғарыпты. «Сәлем де Жұбантайдың Молдашына» деп басталатын төрт жолды Торғай көлемі тегіс біледі.

Молдаш ақсақалдан тараған ұрпақ бүгінде аймақта кеңінен танымал. Баласы белгілі термеші, актер Бөлтірік Молдашов, немересі Бағнұр Молдашовтар мәдениетке өлшеусіз қызмет етіп келеді.

Болат ақындықтан да қаражаяу емес, жүрген жеріне өлең үлестіріп жүретін көңілі жомарт жан. Өнерге шынайы берілген, өмірі дүние жинамаған, қолында барын халқынан аямаған адам. Әйтпесе, ол кісі тапқан малдың кемі жоқ шығар. Сол уақытта Көкалаттың тең жарты тойын өткізді десе таңғалмаймын. Қуанышын әрлеген жаннан тойы иесі аянып қалмайтын кеңшілік уақыттар ғой. Елдің еркелеткені сазгердің шабыты мен уақытын ұрлағаны анық. Бірақ, Болат Молдашұлы шығармашылықтан қол үзбеді. Туған жерін, Торғайын талмай жырға қосты, әндерін арнады. Ол туындылар өңірге кеңінен тарап жатты. «Қабырға толқындары», «Шежірелі Торғай киелім» сынды әндері жүрегіңді шымырлатпай қоймайды. Сондай-ақ, ол мәтінін жазған «Киелі топырақ» туындысы (әні Бақытжан Сәуекендікі) бүгінде кеңінен танымал.

«Асқақтап атың әлі,

Баршаны шақырады.

Өнердің қайнар көзі –

Торғайдың атырабы.

Өсірген қос бәйтерек,

Киелі топырағы», - деп келетін әнді естігенде рухтанбайтын жан жоқ шығар-ақ.

Өнерпаз бүгінде Арқалық қаласында тұрады. Арайлы Арқалығын, туған жер тұлғаларын ән-жырға қосып жүр. Өмірін өнерге арнаған, атақ қумаған сазгер 27 қарашада 63 жасқа толды. 2019 жылы тамызда Көкалатта ауыл күні ұйымдастырылды. Әр жылғы түлектер бас қосып, ауылда «Жастерек» саябағы ашылды. Осынау іс-шара аясында Болат Молдашевтің де шығармашылық кеші өтті. Бұл, бәлкім, автордың Тәуелсіздік жылдарында өткен алғашқы кездесуі болар. Кеудесінде салпыншағы жоқ демесеңіз, Болаттың әндері ешкімнен кем емес. Қазіргі эстрада жүрген ала-құла туындылардан артық түсер жері көп.

Туған елге, туған жерге деген сүйіспеншіліктен туған бұл әуендер әлі талай ұрпақты патриоттық рухта тәрбиелей бермек. Бұған дейін автордың бірнеше әні антологияларға кірді, өзінің күшімен «Көңіл толқындары» атты кітабы шықты.

Болат Молдашұлының жұлдызы жарқырайтын күн алыс емес. Қазір оның әндеріне танымал әншілер «құда түсіп», аттай қалап алып жатыр. Кәсіпкер інісі Қайрат Бекболат ағасын насихаттауда көп еңбек сіңіріп жүр.

Сазгер зейнетке кенелер, қазақ «тал түс» дейтін шақта. Пайғамбар жасында. Аты жаман пандемия жойылып, Арқалықта сазгердің шығармашылық кеші өтіп, мерейі тасыса деген тілек айтып жүр жерлестері. Біз де өнерпазды зейнет жасымен құттықтап, еңбегінің елене беруін тілейміз!