ЕСІМІН ЕКІ ЖЫЛДА ЖҰЛДЫЗ ЕТКЕН...

Екі жылда халықаралық бес байқаудың бас жүлдесі мен бірінші орындарын қанжығасына байлаған ұл – Қостанай мақтанышы

Ол туғанынан ән әлеміне ерекше елітетін. Таңдайына бұлбұл ұялап, өнбойына өнер дарыған бала Қостанай ауданына қарасты Алтынсарино ауылында туған. Қазір небары 19 жаста, осы аралықта бағындырған белесі көз сүйсінтіп, көңіл марқайтады.

Әңгімені әріден бастасақ, тумысынан таланы мен таланты ән әлеміне жетелеген бозбала 17 жасында ұстаз іздеп, Раушан Торғаева есімді вокал үйірмесінің жетекшісіне жолығады.

Бұл кісіні кезіктіруім – бармақтай бағымның есесі , - деп ағытылды Алмат. - Өнердегі ұстазым - өз ісінің кәнігі шебері. Неге десеңіздер, ол кісінің тәліміне дейінгі кезеңім мен қазіргі деңгейімнің арасында аспан-көк айырмашылық жатқанын байқау қиын емес.

Раушан Торғаеваның жарты жылдық қана тәлімінен соң, халықаралық «Алтын микрофон» байқауына түседі. Бұл – әуелгі додасы. Нәтиже – жүлделі ІІ орынның лауреаты! Екінің біріне бұйыртпайтын бақ дерсіз!

Дәл осы тұста Алматтың жұлдызды сәтінің жарқ еткен шағы еді. Себебі, Қостанайда өткен дәстүрлі халықаралық байқауда дарынды бала «Бозторғай» аталатын мақтаулы доданың директоры Қарлығаш Әбдікәрімованың көзіне ілігіп, шақырту алады. Қатысады. Қоржынына І орынды салады!

Қарлығаш ханым Әбдікәрімова өз басы өнерлі ұлдың дарынына тәнті болып, халықаралық додаларға жол тартуды ұсынады. Осылайша, жерлесіміз Алмат Жаңабай Қап тауының етегіндегі Грузияда өткен Tetri Tolia байқауын бетке алған еді.

Бұл өнер додасына әлемнің әр түпкірінен тұяғымен тас тураған тума-дарындар жиналды. Ұзын саны – жүзге жуық. Ғаділін айтқан қазылар алқасы кіл күліктің арасынан Қазақстаннан келген Алмат Жаңабайды бас жүлдеге лайықты деп таныды!
Иә, жоғарыда тізіп өткеніміз аз жетістік емес. Алайда, Алмат тоқым кептіріп, тоқмейілсімей жуырда ғана халықаралы үш байқаудың жүлдесін жеңіп алды.

Болгарияның Солнечный берег және Тутракан қалаларында екі бірдей байқау бір уақытта ұйымдастырылды. Мұнда Алмат өз жасының тобында бірінші орынды еншілесе, екінші өнер сайысында бірінші орыннан бөлек бас жүлдені де елге алып келді!

Қазіргі уақытта Алмат Қостанайдағы колледждердің бірінде бағдарламашы мамандығы бойынша білім алуда. Болашағын компьютерлік технологиялармен бе, жоқ әлде жұлдызды әншілікпен байланыстырарын әлі нақ шешпеген. Әзірге белгілісі – ұстазы екеуі басқа да байқауларды бағындыруға қызу дайындық үстінде.

- Бүгінде Мүсілім Магомаевтың «Синяя вечность» атты әніне машықтанудамын. Өз басыма осы туынды ерекше ұнайды, - дейі Алмат. - Бұл әнді келер уақытта үлкен сахнада, айтулы іс шарада орындаймын деген сенімдемін.

Нұрқанат НҮСІПХАН