Биыл бұрынырақтан бері Таран болып әспеттелген ауданның атауы Бейімбет Майлин болып жаңғырды. Бұл жолда жарғақ құлағы жастыққа тимей барын салған қоғам белсенділерінің, сөз жоқ, еңбегі жанды. Ұзағынан сүйіндірсін! Енді, міне, тұтас Тобыл-Торғай топырағын тебіренткен, сол тебіреніс толқыны қазақ елін қамтыған қуанышты жаңалық – өңірімізде өтетін республикалық айтыс «Бейімбеттің биігі»!
Би-ағаның 125 жылдығына орайластырылған республикалық айтыс «Рухани жаңғыру» бағдарламасының аясында қыркүйектің 26-27 жұлдыздары аралығында өтеді. Бимұхамбеттің биігін жырлауға Қазақстанның әр түпкірінен 14 ақын жыр екпінін ағытады. Айтыс аламанын ұдайы бақылауда ұстайтын қауымға жақсы таныс Мейірбек Сұлтанхан (Қызылорда), Жарқын Жұпархан (СҚО), Шұғайып Сезімхан (Алматы), Айбек Қалиев (Арқалық) сынды мықтылар және өз өнер-өресімен айналасына дабысын танытып үлгерген ақындардың шоғыры шама байқасады.
Қазылардың құрамында А.Байтұрсынов атындағы ҚМУ профессоры, филология ғылымдарының кандидаты, ҚР мәдениет қайраткері, ақын Ақылбек Шаяхмет, Қазақстанның еңбек сіңірген қайраткері, филология ғылымдарының докторы, профессор, ақын Аманжол Әлтаев, Қазақстанның еңбек сіңірген қайраткері, филология ғылымдарының докторы, профессор, ҚР Жазушылар одағының төрағасы Ұлықбек Есдәулет, балалар әдебиетінің көрнекті өкілі, әдебиеттанушы, «Дарын» жастар сыйлығының лауреаты Елдос Тоқтарбай бар. Ал қазылар алқасының төрағасы – Қазақстанның халық ақыны Беркенова Әсия Әйіпқызы. Тізгінді айтыстың абызы Жүрсін Ерман ұстайды.
Қостанай облысының орталығында өтетін сөз барымтасы екі кезеңнен тұрады. Тақырыпты ашу шеберлігімен ерекшеленген, кестелі сөзбен оймақтай ойын жеткізе білген, «мен» деген алты ақын ақтық сында «сөз қағысады».
«Бейімбеттің биігі» республикалық айтысы Қостанай қаласындағы «Жастар сайында» 26-қыркүйекте сағат 16.00-де және 27-қыркүйекте 11.00-де өтеді. Билет құны – 700 теңге, «Жастар сарайының» кассасында сатылады. Меделі уақытта келіп, сөз дариясынан сусындап, рухыңды серпілт, көрермен!
Нұрқанат НҮСІПХАН
Халық шығармашылығы
орталығының ақпараттық редакторы
Dala_FestKPIАйтысАуыл_тынысыАхмет_Байтұрсынұлы_–_150_жылДеген_екенДомбыра күніЕлге_сәлемЖеңімпаздарЖыр_маржанКездесулер_мен_презентацияларКонцертМарапаттауМәдени_мұраСаясатСағындырған_әуендерТарих_жебесіТеатр_әлеміндеТобыл-Торғай_әуендеріШығармашылық_кешҚазақтың_дәстүрлі_1000_күйіҚұттықтаймыз!Ән_–_көңілдің_ажары
